काठमाडौंः दोलखाको गौरीशंकर गाउँपालिका वडा नम्बर ९ मा सिप्रिङ खोलामा आएको बाढीले बगाउँदा ७३ वर्षीय चसमान तामाङ बेपत्ता हुनुभएको छ । ४ जना जोखिमपूर्ण स्थानमा बसेर उद्धारको पर्खाइ गरिरहेको सो वडाका वडाध्यक्ष ङिमगेली शेर्पाले बताउनुभएको छ ।
वडाध्यक्ष शेर्पाका अनुसार चसमानका गाई बाख्रा पहिरोले गोठसहित बगाएको छ । बाढीका कारण सिप्रिङ खोला जलविद्युत केन्द्रमा कार्यरत कर्मचारी शुकदेव श्रेष्ठ, सूर्यबहादुर तामाङ, कल्याण विक र विनोद श्रेष्ठ भीरमा अडिएर बसेका छन् । सो ठाउँ पनि असुरक्षित रहेको तर निरन्तरको बाढीका कारण उद्धार गर्न कठिन भएको वडाध्यक्ष शेर्पा बताउनुहुन्छ ।
अहिले प्रहरीहरू सिंगटी र रोल्वालिङबाट घटनास्थल गइसकेको र पैदलै जानुपर्ने हुनाले केही समय लाग्ने जिल्ला प्रहरी कार्यालय दोलखाले जनाएको छ ।
सिप्रिङ खोला जलविद्युत केन्द्रको ड्याम साइड पनि बाढीले क्षति गरेको छ ।
