विराटनगरः अनुगमनका क्रममा औषधि बिक्री तथा भण्डारणमा तोकिएको मापदण्ड पालना नगरेको पाइएपछि विराटनगरको अस्पताल चोकमा सञ्चालित तीनवटा फार्मेसीमा सिल गरिएको छ ।

जिल्ला प्रशासन कार्यालय मोरङको नेतृत्वमा मंगलबार गरिएको संयुक्त अनुगमनका क्रममा औषधि व्यवस्था विभागले इमान फार्मेसी, खुश फार्मेसी र सुरेश फार्मेसी सिल गरेको हो । अनुगमनका क्रममा फार्मेसीको नवीकरण, दर्तावाला फार्मासिस्टको उपस्थिति, औषधिको बिक्री तथा भण्डारणलगायत विषयमा त्रुटि भेटिएको हो ।

औषधि व्यवस्था विभाग विराटनगरका फार्मेसी निरीक्षक एलन खड्काका अनुसार खुश फार्मेसीमा दर्तावाला फार्मासिस्ट अनुपस्थित रहेको, औषधि विज्ञ नभएको तथा दर्ता नभएका औषधिसमेत बिक्रीका लागि राखिएको भेटिएको थियो ।

त्यस्तै, इमान फार्मेसीको नवीकरण अवधि सकिएको र विभागको स्वीकृतिबिनै स्थान परिवर्तन गरी सञ्चालन गरिएको पाइएको थियो ।

सुरेश फार्मेसीले भने लामो समयदेखि नवीकरण नै नगरी औषधि पसल सञ्चालन गर्दै आएको अनुगमनका क्रममा खुलेको छ । उक्त फार्मेसीले २०७५ सालदेखि नवीकरण नगरेको पाइएको हो ।

औषधि ऐनको संशोधित व्यवस्थाअनुसार फार्मेसीको सञ्चालन अवधि सकिएपछि ३० दिनभित्र नवीकरण गर्नुपर्ने व्यवस्था छ ।

अनुगमनका क्रममा बिलबिजक व्यवस्थित नराखेका केही औषधि पसललाई राजस्व अनुसन्धान कार्यालयले जरिवानासमेत गरेको थियो ।

औषधि व्यवस्था विभागसँगै वाणिज्य, आपूर्ति तथा उपभोक्ता संरक्षण कार्यालय र राजस्व अनुसन्धान कार्यालय विराटनगरका प्रतिनिधि सम्मिलित टोलीले अनुगमन गरेको थियो ।