इटहरीः अन्तर्राष्ट्रिय शिक्षामा सहकार्य विस्तार गर्ने प्रतिबद्धतासहित नेपाल शैक्षिक परामर्श संघ पूर्वाञ्चल शाखाको समन्वय र सहजीकरणमा आयोजित एजेण्ट मिट एण्ड ग्रीट कार्यक्रम इटहरीमा सम्पन्न भएको छ ।
नेपालका लागि विश्वविद्यालयका कन्ट्री म्यानेजर सुमन अधिकारीको निमन्त्रणामा आयोजित कार्यक्रममा पूर्वी नेपालका विभिन्न शैक्षिक परामर्शदाता, शैक्षिक परामर्श व्यवसायी तथा कन्सल्टेन्सी सञ्चालकहरूको उल्लेखनीय सहभागिता रहेको थियो ।
कार्यक्रममा विदेशी विश्वविद्यालयका शैक्षिक कार्यक्रम, अन्तर्राष्ट्रिय मान्यता, विद्यार्थी भर्ना प्रक्रिया, छात्रवृत्ति, विद्यार्थी सहायता सेवा तथा साइप्रसमा अध्ययनका विविध अवसरबारे जानकारी दिइएको थियो ।
सहभागीहरूले विश्वविद्यालयका प्रतिनिधिसँग प्रत्यक्ष अन्तरक्रिया गर्दै भर्ना प्रक्रिया, छात्रवृत्ति, अन्तर्राष्ट्रिय अध्ययनका सम्भावना तथा भावी संस्थागत सहकार्यका विषयमा विस्तृत जानकारी आदानप्रदान गरेका थिए । कार्यक्रममा सहभागीहरूले राखेका जिज्ञासाको विश्वविद्यालयका प्रतिनिधिले जवाफ दिएका थिए ।
कार्यक्रमका विशेष अतिथिमा इक्यानका केन्द्रीय सदस्य कमल तिम्सिना तथा नागरिक समाज इटहरीका पूर्व अध्यक्ष एवं सङ्गीत साधना प्रतिष्ठान नेपाल इटहरीका महासचिव राजु केसी हुनुहुन्थ्यो । कार्यक्रमको सहजीकरण दिव्यराज गुरुङले गर्नुभएको थियो ।
कार्यक्रमको अध्यक्षता इक्यान पूर्वाञ्चल शाखाका अध्यक्ष रविकुमार गुप्ताले गर्नुभएको थियो भने सञ्चालन शाखाका सचिव गोपाल निरौलाले गर्नुभएको थियो ।
