लेटाङः विराटनगर–५ स्थित एभरेष्ट स्कुलका कक्षा १२ का विद्यार्थीहरूले मोरङको लेटाङ नगरपालिका–१ स्थित प्राकृतिक तथा ऐतिहासिक महत्व बोकेको राजारानी क्षेत्रमा हाइकिङ गरेको छ ।
लेटाङ–२ को किराँत चोकबाट शुरु भएको पदयात्रा करिब डेढ घण्टाको उकालोपछि राजारानी ताल पुग्नेबित्तिकै उत्साहमा परिणत भएको थियो ।
त्यहाँ पुगेपछि उनीहरूले प्रकृतिको सन्तुलन, जैविक विविधताको महत्त्व र संरक्षणको आवश्यकता पनि बुझ्ने मौका पाए । राजारानी सामुदायिक वनका अध्यक्ष सुजन मगरले त्यस क्षेत्रको इतिहास सुनाइरहँदा विद्यार्थीहरू गम्भीर भएर सुन्दै थिए । राजारानीलाई अजिङ्गरहरूको राजधानी मानिने, धिमाल समुदायको उद्गमस्थलका रूपमा लिइने तथा यस क्षेत्रको ऐतिहासिक र सांस्कृतिक महत्वबारे जानकारी दिँदा विद्यार्थीहरूले पुस्तकबाहिरको इतिहाससँग साक्षात्कार गर्ने अवसर पाएका थिए ।
राजारानी भ्रमणको अर्काे विशेष आकर्षण बन्यो लेटाङ नगरपालिकाले निर्माण गरेको अन्तरधार्मिक पार्क । हिन्दू, बौद्ध, किरात, इस्लाम र इसाई धर्मबीच सद्भाव र सहअस्तित्वको सन्देश दिने उद्देश्यले निर्माण गरिएको पार्कले विद्यार्थी, शिक्षक र सहभागी सबैको ध्यान तान्यो ।
लेटाङ नगरपालिकाका प्रमुख भुपेन्द्र लावती र उपप्रमुख कृष्णकुमारी निरौला स्वयं उपस्थित भएर विद्यार्थीहरूलाई स्वागत गर्नुभएको थियो । उहाँहरूले राजारानी क्षेत्रको प्राकृतिक, जैविक, ऐतिहासिक तथा पर्यटन महत्वबारे विस्तृत जानकारी गराउनुभएको थियो ।
