गोठगाउँः भोलि भदौ २० गते मोरङको सुन्दरहरैंचा नगरपालिका वडा नम्बर ७ गोठगाउँमा रहेको पञ्चायत माध्यमिक विद्यालयमा पूर्व विद्यार्थीको भेला हुने भएको छ ।
सो विद्यालयमा अध्ययन गरेका पूर्व विद्यार्थीहरूलाई एकजुट बनाई विद्यालयको विकास र समृद्धिमा योगदान पुर्याउने उद्देश्यले बृहत् पूर्व विद्यार्थी भेला आयोजना हुने लागेको भेला आयोजक समितिका संयोजक बलभद्र बिष्टले जानकारी दिनुभयो ।
आयोजक समितिले आज पत्रकार सम्मेलन गरी दिएको जानकारीअनुसार भोलि बिहान ११ बजे पूर्व विद्यार्थीहरूको भेला आयोजना गरी विद्यालयको विकासमा सामूहिक योगदान पुर्याउन छलफल गरिनेछ । विद्यालयले आफूलाई ज्ञान, शिक्षा र संस्कार दिएको हुनाले पूर्व विद्यार्थीहरू पनि आफ्नो विद्यालयप्रतिको जिम्मेवारी सम्झेर विद्यालयको समृद्धिमा सकेको योगदान दिन तयार हुनुपर्छ भनेर भेला आयोजना गरिएको उहाँले जानकारी दिनुभयो ।
पूर्व विद्यार्थी समाज गठन गरी पुराना सम्बन्धलाई जोड्दै पूर्व विद्यार्थीबीच एकता र सहकार्य बढाउने तथा विद्यालयसँगको आत्मीय सम्बन्ध अझ मजबुत बनाउने उद्देश्य राखिएको जनाइएको छ ।
विद्यालय व्यवस्थापन समितिका अध्यक्ष पोष्टकुमार श्रेष्ठले विद्यालयबाट शिक्षा लिएर विभिन्न क्षेत्रमा स्थापित हुनुभएका पूर्व विद्यार्थीहरू विद्यालयका महत्वपूर्ण सम्पत्ति भएकाले उहाँहरूको ज्ञान, अनुभव, सीप र सहयोगलाई विद्यालयको विकाससँग जोड्न सके विद्यालयलाई अझ उत्कृष्ट शैक्षिक केन्द्रका रूपमा अघि बढाउन सकिने हुनाले पूर्व विद्यार्थीको भेला र सो भेलाले गर्ने निर्णय महत्वपूर्ण हुने अपेक्षा गरिएको बताउनुभयो ।
‘तपाईंको उपस्थिति, हाम्रो शक्ति, तपाईंको योगदान, विद्यालयको समृद्धि’ भन्ने नाराका साथ भेलाको आयोजना गरिएको आयोजकले जनाएको छ ।
