धनुषा- धनुषा जिल्लाको लक्ष्मीनिया गाउँपालिका-७ स्थित पोखरीमा डुबेर तीन बालकको मृत्यु भएको छ। हिजो साँझ घटेको यस घटनामा १० वर्षीय आदित्य कुमार साह, ८ वर्षीय आयुस साह, र १४ वर्षीय सुशान्त साहले ज्यान गुमाएका छन्।
इलाका प्रहरी कार्यालय सखुवा महेन्द्रनगरका प्रहरी निरीक्षक सोनु कुमार साहका अनुसार, बालकहरु आफ्नो हजुरबुबा महावीर साहको घरमा भोज खान आएका थिए। परिवारका सदस्यहरु भोजमा व्यस्त रहेको बेला तीन बालक पोखरीतर्फ गएका थिए र त्यहीँ डुबेर मृत्यु भएको हो। मृतक तीनै बालक महावीर साहका तीन छोरीका जेठा छोरा थिए।
प्रहरीले घटनाको जानकारी पाएलगत्तै घटनास्थलमा पुगेर अनुसन्धान थालेको छ। तीनैजना बालकको शव पोस्टमार्टमको लागि जनकपुरस्थित प्रादेशिक अस्पतालमा राखिएको छ। घटनाबारे थप अनुसन्धान भइरहेको इलाका प्रहरी कार्यालय सखुवा महेन्द्रनगरले जानकारी दिएको छ।
यो दर्दनाक घटनाले स्थानीय बासिन्दामा शोकको माहोल छाएको छ। बालबालिकाको सुरक्षामा ध्यान दिनुपर्ने कुरा यस घटनाले फेरि एकपटक उठाएको छ।
