विराटचोकः सामाजिक सञ्जालमा तथा विद्यालयमा विद्यार्थीमाथि यौनजन्य दुर्व्यवहार गरेको आरोपमा मोरङको सुन्दरहरैंचास्थित सुकुना माध्यमिक विद्यालयका शिक्षक र कर्मचारी गरी तीन जना पक्राउ परेका छन् ।
पीडित विद्यार्थीले सामाजिक सञ्जालमा आफूमाथि भएको यौनजन्य च्याटको स्क्रिनसट राखेपछि अन्य विद्यार्थीले पनि आफूहरुलाई कक्षामा, फोनमा तथा भेटमा यौनजन्य दुर्व्यवहार गरेको बताएका थिए ।
विद्यार्थीमाथि भएको भनिएको अमर्यादित व्यवहारमा संलग्न रहेको आरोपमा एक जना शिक्षकसहित ३ जना पक्राउ परेका हुन् । इलाका प्रहरी कार्यालय बेलबारीका अनुसार घटनाको अनुसन्धान शुरु गरिएको छ ।
घटना सार्वजनिक भएपछि सुन्दरहरैंचा नगरपालिकाले विज्ञप्ति निकाली घटनाको छानबिन गर्न विद्यालयलाई निर्देशन दिइसकिएको जनाएको थियो ।
मोरङ क्षेत्र नम्बर ३ का सांसद गणेश कार्कीले घटनाको बारेमा आफूलाई जानकारी प्राप्त भएको र सुरक्षा निकायलाई अनुसन्धानका लागि अनुरोध गरिसकिएको सामाजिक सञ्जालमार्फत् जानकारी दिनुभएको थियो ।
पक्राउ परेकामध्ये एक जनाको नाम सार्वजनिक भए पनि अन्यको नाम सार्वजनिक भएको छैन ।
