भोजपुरः हरियो जङ्गलको बीचबाट नागबेली आकारमा झरेको भोजपुर सदरमुकामबाट कोटडाँडा हुँदै पिखुवा खोला किनारको बेहेरे दोभानसम्मको सडक यतिबेला आन्तरिक पर्यटकको रोजाइमा पर्दै गएको छ ।
यो सडकको दृश्यले जो कोहीलाई पनि सहजै आकर्षित गर्ने गर्दछ । भोजपुर नगरपालिका वडा नम्बर १२ मा पर्ने यो सडक करिब १३ किलोमिटर लामो रहेको छ । उकालो–ओरालोमा दर्जनौँ घुम्ती पार गर्दै निर्माण गरिएको यो मार्गले दुर्गम बस्तीलाई सदरमुकामसँग जोड्नुका साथै यहाँको जनजीवनमा ठूलो परिवर्तन ल्याएको स्थानीय बताउँछन् ।
पहिले घन्टौं पैदल हिँड्नुपर्ने ठाउँमा अहिले सवारी साधन पुग्न थालेपछि स्थानीयवासीको दैनिकी सहज बनेको छ । यो सडकले भोजपुरलाई दक्षिणी क्षेत्रसँग जोडेको छ । माथिबाट हेर्दा लामो सर्पजस्तै घुमाउरो देखिने यो सडकको दृश्यले फोटोग्राफी तथा भिडियो खिच्न रुचाउने तथा टिकटक बनाउनेका लागि आकर्षक देखिन्छ ।
सामाजिक सञ्जालमा यस्ता तस्बिर तथा भिडियो व्यापक रूपमा पोस्ट हुन थालेपछि यहाँ घुम्न आउने आन्तरिक पर्यटकको सङ्ख्यासमेत बढेको छ । प्राकृतिक सौन्दर्यले भरिपूर्ण यस क्षेत्र वरिपरि फैलिएको हरियाली वन, डाँडाकाँडा र तल बगिरहेको पिखुवा खोलाको मनोरम दृश्यले यात्रालाई अझ रमणीय बनाउने गर्दछ । बिहानको कुहिरो र साँझपखको सुनौलो घामले सडकलाई झन् आकर्षक बनाउने गरेको छ ।
यो सडकले कृषि उत्पादन बजारसम्म पुर्याउन सहजता ल्याएको छ । आलु, मकै, अदुवा, फलफूललगायत कृषिउपज ढुवानीमा सहज भएपछि किसानलाई प्रत्यक्ष लाभ पुगेको छ । सडक सञ्चालनमा आएपछि यहाँको व्यापार–व्यवसाय पनि विस्तार हुन थालेको छ ।
