इनरुवाः नेपाल भारत सीमा क्षेत्र सुनसरीको बर्जु गाउँपालिका–३ खरीटोलबाट करिब ८ सय मिटर दक्षिणबाट सशस्त्र प्रहरीले आज बिहान पौने ३ बजे १६० केजी गाँजा बरामद गरेको छ । गाँजा ओसारपसारमा संलग्न व्यक्ति भने फरार हुन सफल भएका छन् ।
केही व्यक्तिहरुले टाउकोमा बोकी नेपालबाट भारततर्फ लैजाँदै गरेको अवस्थामा अन्दाजी १६० केजी (१२ पोका) तयारी अवस्थामा रहेको गाँजा सशस्त्र प्रहरीको मोबाइल गस्ती टोलीले नियन्त्रणमा लिएको हो । सशस्त्र प्रहरी बल, नेपाल सीमा सुरक्षा गुल्म कप्तानगंजबाट सशस्त्र प्रहरी नायव उपरीक्षक नन्दकिशोरप्रसाद महतोको कमाण्डमा खटिएको ५ जना र सशस्त्र प्रहरी बल, नेपाल बिओपी अमडुवाबाट सशस्त्र प्रहरी निरीक्षक दिलकुमार माझीको कमाण्डमा खटिएको ५ जना गरी जम्मा १० जनाको संयुक्त टोलीले गस्तीका क्रममा उक्त गाँजा फेला पारेको प्रहरीले जनाएको छ ।
प्रहरी टोलीलाई देखेपछि गाँजा बोकेका व्यक्तिहरु सामान छाडी फरार भएका थिए । बरामद गरिएको गाँजा सशस्त्र प्रहरी बल, नेपाल बिओपी अमडुवा, सुनसरीमा राखिएको र फरार व्यक्तिको खोजी कार्य जारी रहेको प्रहरीले जनाएको छ ।
