मलगंवाः हिजो राति साढे ११ बजे सर्लाहीको धनकौल गाउँपालिका–४ मैनाथपुर पकाहा टोलमा चट्याङले लागेर १४ पशु चौपायाको मृत्यु भएको छ । एक जना मानिस घाईते भएका छन् ।
सो घटनामा चट्याङले लागेर स्थानीय ६० वर्षीय सीताराम यादव घाइते भएका हुन् । उनको टाउकोसहित शरीरका विभिन्न भाग जलेको प्रहरीले जनाएको छ । घाइते यादवलाई तत्काल उपचारका लागि रौतहटस्थित तराई अस्पतालमा लगिएको छ । उनको अवस्था मध्यम रहेको र उपचार भइरहेको प्रहरीले जनाएको छ ।
घटनाबारे आइतबार बिहान करिब ३ बजे सूचना प्राप्त हुनासाथ इलाका प्रहरी कार्यालय हरकठवाबाट प्रहरीको टोली घटनास्थलमा पुगेको थियो । चट्याङ परेपछि आगलागी भई यादवको घर गोठमा रहेको पशु चौपाया, अन्नपात तथा लत्ताकपडा जलेर नष्ट भएको प्रहरीले जनाएको छ ।
प्रहरीका अनुसार चट्याङकै कारण ९ वटा बाख्रा र ५ वटा भैँसी जलेर मरेका छन् भने एउटा पाडो घाइते भएको छ । घरमा राखिएको करिब १ क्वीन्टल चामल, १० क्वीन्टल धान, २ क्वीन्टल गहुँ, १ क्वीन्टल मुसुरोको दाल, भाँडावर्तन तथा लत्ताकपडा पूर्ण रूपमा जलेर नष्ट भएको जिल्ला प्रहरी कार्यालय सर्लाहीले जनाएको छ ।
