खोटाङः खोटाङको वराहपोखरी गाउँपालिकामा भीरबाट लड्दा दुई जनाको ज्यान गएको छ ।
वराहपोखरी गाउँपालिका–५ पौवासेराका ५२ वर्षीय बमबहादुर राई र ४० वर्षीय मनीकुमार राई शनिबार दिउँसो ढकालेखोला आसपासको भीरबाट खसेका थिए । दुवै जना घटनास्थलमै मृत फेला परेका हुन् ।
स्थानीयका अनुसार बमबहादुर अघिल्लो दिन घाँस काट्न जाँदा हराएको खुकुरी खोज्न छिमेकी मनीकुमारलाई साथमा लिएर ढकालेखोला भीर पुगेका थिए । त्यस क्रममा भीरको अप्ठ्यारो भागमा पुगेपछि एक जना चिप्लिएको र जोगाउने प्रयासमा अर्को पनि सँगै तानिँदा दुवै जनाले सन्तुलन गुमाएर भीरबाट खसेर ज्यान गएको हुन सक्ने प्रारम्भिक अनुमान गरिएको छ ।
