धनकुटाः हिजोदेखि श्री नं. २ बाहिनी अड्डाको आयोजनामा धनकुटाको हिलेमा ‘वाहिनीपति ट्रफी २०८३’ शुरु भएको छ ।
सैनिकबीच सामुहिक भावना अभिवृद्धि, अनुशासन विकास तथा उत्कृष्ट खेलाडीको पहिचान गर्ने उद्देश्यले प्रतियोगिता आयोजना गरिएको नेपाली सेनाले जनाएको छ । हिलेस्थित महेन्द्र सैनिक शिविरको मैदानमा शुरु भएको खेल वैशाख ३१ गतेसम्म सञ्चालन हुने जनाइएको छ ।
प्रतियोगितामा फुटबल, भलिबल, बास्केटबल, जुडो, बक्सिङ, तेक्वान्दो, कबड्डी, स्विमिङ र एथलेटिक्स गरी नौ विधामा प्रतिस्पर्धा हुने जनाइएको छ ।
सो प्रतियोगितामा धनकुटाको हिले स्थित श्री नं. २ बाहिनी अड्डा, सल्लेरीको भीम दल गण, सुनसरीस्थित भगवती दल र भीमकाली गुल्म, मोरङको शिवदल गण, भोजपुरको नयाँ श्रीनाथ गण, संखुवासभाका इन्द्रदल गुल्म र रणदल गुल्म तथा तेह्रथुमको शत्रुमर्दन गुल्मका खेलाडीहरूको सहभागिता रहने बताइएको छ ।
प्रतियोगिता धनकुटाको हिलेस्थित ब्यारेक, सल्लेरी ब्यारेक र धनकुटाको तल्लो टुँडिखेलमा सञ्चालन हुने आयोजकले जनाएको छ ।
