काठमाडौंः आइसिसी विश्वकप क्रिकेट लिग–२ अन्तर्गत घरेलु मैदानमा नेपालले स्कटल्यान्डमाथि शानदार जीत निकाल्दै अंक तालिकाको पाँचौँ स्थानमा उक्लिएको छ । कीर्तिपुरस्थित त्रिवि क्रिकेट मैदानमा हिजो भएको खेलमा नेपालले स्कटल्यान्डलाई ६ विकेटले पराजित गर्दै महत्वपूर्ण दुई अंक जोडेको हो ।
स्कटल्यान्डले दिएको १९५ रनको लक्ष्य नेपालले ३८ दशमलव १ ओभरमा चार विकेट गुमाएर पूरा गरेको थियो । नेपालको जीतमा कप्तान रोहित पौडेलले ९८ बलमा पाँच चौका र दुई छक्काको सहयोगमा सर्वाधिक ७४ रन बनाएका थिए । इशान पाण्डेले ५५ रनको अर्धशतकीय इनिङ खेल्दा आसिफ शेखले २९ तथा कुशल भुर्तेलले २८ रनको योगदान दिए ।
स्कटल्यान्डका लागि मार्क वाटले दुई विकेट लिए भने ब्रान्डन म्याकमुलनले एक विकेट हात पारे ।
टस जितेर पहिले ब्याटिङ गरेको स्कटल्यान्ड ३९ दशमलव १ ओभरमै १९४ रनमा समेटिएको थियो ।
जीतसँगै नेपाल २२ अंकसहित लिग–२ को अंक तालिकामा पाँचौँ स्थानमा उक्लिएको छ । पराजित स्कटल्यान्ड भने ३८ अंकसहित शीर्ष स्थानमै कायम छ ।
