विराटचोकः हिजोदेखि शुरु भएको चौथो सुन्दरहरैँचा मेयर गोल्डकपको उद्घाटन खेलमा बेलबारी नगरपालिका विजयी हुँदै सेमीफाइनलमा पुगेको छ ।
खेलमा बेलबारीले पथरीशनिश्चरे नगरपालिकालाई २–१ गोल अन्तरले पराजित गरेको हो । खेलको मध्यान्तरअघि बेलबारीका लागि विल्सन गिरी र अश्विन गौतमले एक–एक गोल गरे भने पथरी शनिश्चरेका सउरे राउतले एक गोल फर्काएका थिए ।
मध्यान्तरपछि भने कुनै पनि टिमले गोल गर्न सकेनन् । खेलको म्यान अफ द म्याच बेलबारी नगरपालिकाका खेलाडी घोषित हुँदै नगद ४ हजार रुपैयाँ प्राप्त गरे ।
कोशी प्रदेशका पर्यटन, वन तथा वातावरण मन्त्री भीम पराजुलीले प्रमुख अतिथिको आसनबाट प्रतियोगिताको उद्घाटन गर्दै ग्रासरुट फुटबलको विकासबिना समग्र खेलकुद क्षेत्रको विकास सम्भव नहुने बताउनुभयो ।
सुन्दरहरैंचा नगर खेलकुद विकास समितिको आयोजनामा भएको प्रतियोगिताको विजेताले नगद ४ लाख रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले नगद २ लाख रुपैयाँसहित ट्रफी, मेडल र प्रमाणपत्र प्राप्त गर्नेछ ।
सुन्दरहरैंचा–१२ स्थित शुक्रबारे खेलमैदानमा आजको खेल आयोजक सुन्दरहरैँचा नगरपालिका र उदयपुरको बेलका नगरपालिका बीच दिउँसो ३ बजे हुने आयोजकले जनाएको छ ।
