विराटचोकः जेठ १६ गतेदेखि शुरु भएको चौथो सुन्दरहरैंचा मेयर गोल्डकपको क्वाटर फाइनल खेलमा पराजित भएसँगै आयोजक सुन्दरहरैंचा नगरपालिका प्रतियोगिताबाट बाहिरिएको छ ।
हिजो शुक्रबारे खेलमैदानमा सम्पन्न प्रतिष्पर्धामा उदयपुरको बेलका नगरपालिकाले आयोजक सुन्दरहरैंचा नगरपालिकालाई घरेलु खेलमैदानमा ४–१ गोल अन्तरले पराजित गरेको हो ।
खेलको मध्यान्तर अघि ३–१ को अवस्थामा रहेको बेलकाले मध्यान्तरपछि थप १ गोल गरेको थियो । खेलमा बेलकाका जर्सी नम्बर ९ का खेलाडी हिमाल मगरले ह्याट्रिक गरेका थिए ।
आज तेस्रो क्वाटर फाइनल खेल मोरङको केराबारी गाउँपालिका र झापाको शिवसताक्षी नगरपालिकाबीच दिउँसो ३ बजे शुक्रबारे खेलमैदानमा शुरु हुनेछ ।
प्रतियोगिताको विजेताले नगद ४ लाख रुपैयाँ र उपविजेताले नगद २ लाख रुपैयाँ पाउनेछन् ।
फाइनल खेल जेठ २३ गते हुने आयोजकले जनाएको छ ।
