विराटचोकः जेठ १६ गतेदेखि सुन्दरहरैंचा नगरपालिका वडा नम्बर १२ स्थित शुक्रबारे खेलमैदानमा जारी चौथो सुन्दरहरैचा मेयर गोल्डकप फुटबल प्रतियोगिताको अन्तिम क्वाटरफाइनल खेलबाट इटहरी उपमहानगरपालिका सेमीफाइनलमा पुगेको छ ।
हिजो भएको अन्तिम क्वाटरफाइनल खेलमा इटहरी उपमहानगरपालिकाले लेटाङ नगरपालिकालाई टाइब्रेकरमा पराजित गरेको हो । निर्धारित समयमा दुवै टोलीले गोलरहित बराबरी खेलेपछि खेलको निर्णय पेनाल्टी सुटआउटबाट गरिएको थियो ।
हिजोको खेलमा इटहरी उपमहानगरपालिकाका निवास फुयाल ‘प्लेयर अफ द म्याच’ घोषित भई नगद ४ हजार रुपैयाँ पुरस्कार प्राप्त गरे ।
प्रतियोगिताको विजेताले ट्रफीका साथमा नगद ४ लाख तथा उपविजेताले ट्रफीका साथमा नगद २ लाख रुपैयाँ प्राप्त गर्ने आयोजक सुन्दरहरैंचा नगर खेलकुद विकास समितिले जनाएको छ ।
प्रतियोगिताको पहिलो सेमीफाइनल खेलअन्तर्गत आज दिउँसो ३ बजे मोरङका केराबारी गाउँपालिका र बेलबारी नगरपालिका आमनेसामने हुनेछन् ।
