इटहरीः कोशी प्रदेशको आन्तरिक मामिला तथा कानुन मन्त्रालयले स्थानीय र प्रदेशबाट हालसम्म जारी भएका कानुनको डिजिटल अभिलेखीकरण कार्यसम्बन्धी तालिम इटहरीमा सम्पन्न भएको छ । गाउँपालिका राष्ट्रिय महासंघ नेपालसँगको सहकार्यमा कोशी प्रदेशका मोरङ, उदयपुर र सुनसरीका गाउँपालिकाका सम्बन्धित जनप्रतिनिधि र कर्मचारीलाई तालिम दिइएको हो ।
इटहरीको स्काइ लक्स होटलमा भएको कानुन अभिलेखीकरण प्रणालीसम्बन्धी तालिममा तीन जिल्लाका गाउँपालिकाका अध्यक्ष, उपाध्यक्ष, प्रमुख प्रशासकीय अधिकृत, सूचना प्रविधि शाखाका प्रमुख तथा कर्मचारीलगायतको उपस्थिति थियो ।
तालिम उद्घाटन समारोहका प्रमुख अतिथि आन्तरिक मामिला तथा कानुन मन्त्री इन्द्रमणि पराजुलीले धनकुटामा कोशी प्रदेश सरकारले पहिलो पटक कानुन अभिलेखीकरण प्रकृया शुरु गरेको जानकारी दिनुभयो ।
गाउँपालिका राष्ट्रिय महासंघ नेपालसँगको सहकार्यमा सबैभन्दा पहिले कोशी प्रदेशले डिजिटल रूपमा नै सबै १३७ पालिका र प्रदेश सरकारले राजपत्रमा प्रकाशित गरेका नीति, ऐन, नियम, कार्यविधि, निर्देशिका तथा मापदण्डलाई अभिलेखीकरण गर्न लागिएको मन्त्रालयका उपचसचिव भोजराज दाहालले बताउनुभयो ।
महासंघसँगको सहकार्यमा मन्त्रालयले प्रदेशका १४ जिल्लालाई ६ वटा क्लष्टरमा विभाजन गरी कानुन अभिलेखीकरण प्रणाली सञ्चालन सम्बन्धी अभिमुखीकरण गरिरहेको महासंघले जनाएको छ ।
धनकुटाबाट शुरु भएको कार्यक्रम मोरङ, सुनसरी, उदयपुर, खोटाङ, तेह्रथुम, संखुवासभा र ओखलढुङ्गामा सम्पन्न भइसकेको छ ।
सो तालिम आज इलाम र झापाका पालिकाका जनप्रतिनिधि र कर्मचारीका लागि इलाममा र भोलि ताप्लेजुङ र पाँचथरमा हुने गाउँपालिका राष्ट्रिय महासंघ कोशी प्रदेशका अध्यक्ष ऐयुब अन्सारीले जानकारी दिनुभयो ।
स्थानीय र प्रदेश सरकारले जारी गरेका हालसम्मका कानुनहरु प्रदेश र संघीय तहमा कहीँ पनि अभिलेखीकरण हुन नसकेको समयमा कोशी प्रदेश सरकारले सो कार्य शुरु गरेको हो ।
