विराटचोकः मोरङको सुन्दरहरैंचा नगरपालिकाको आयोजनामा भएको चौथो सुन्दरहरैंचा मेयर गोल्डकपको उपाधि सुनसरीको इटहरी उपमहानगरपालिकाले जितेको छ ।
हिजो साँझ भएको फाइनल प्रतिष्पर्धामा केराबारी गाउँपालिकालाई २–१ गोलले हराउँदै इटहरी उपमहानगरपालिका च्याम्पियन बनेको हो ।
खेलमा इटहरीका निश्चलकुमार श्रेष्ठ र असिम राईले गोल गरेका थिए । केराबारीका नगेन राईले सान्त्वना गोल फर्काएका थिए ।
इटहरीको तर्फबाट गोल गर्नेमध्येका निश्चलकुमार श्रेष्ठ फाइनल खेलको प्लेयर अफ द म्याच घोषित हुँदै नगद ४ लाख रुपैयाँ हात पारे ।
खेलमा सर्वाधिक गोल गर्ने बेलका नगरपालिकाका खेलाडी हिमाल मगरले सर्वाधिक गोलकर्ताको पुरस्कार पाए ।
उपाधिसँगै इटहरीले ४ लाख रुपैयाँ प्राप्त गरेको छ । उपविजेता केराबारी गाउँपालिकाले नगद २ लाख रुपैयाँ पाएको छ । फाइनल खेलका प्रमुख अतिथि प्रदेश सांसद ज्ञानेन्द्र सुवेदीले विजेता तथा उपविजेता टिमलाई नगद तथा ट्रफी प्रदान गर्नुभएको थियो ।
जेठ १६ गते शुरु भएको प्रतियोगितामा मोरङ, सुनसरी र उदयपुरका ८ पालिका सहभागी थिए ।
