गछियाः मोरङको सुन्दरहरैंचा नगरपालिका वडा नं ३ मा रहेको ज्येष्ठ नागरिक सेवा समाज नेपालले माता सम्मान कार्यक्रमको आयोजना गरेको छ ।
वडा नं ३ स्थित लक्ष्मीनारायण मन्दिरको सभाहलमा समाजमा मातृत्वको योगदानको कदर गर्दै माताहरुलाई सम्मान गरेको हो । कार्यक्रममा २५० भन्दा बढी आमाहरूलाई सम्मान गरिएको जेष्ठ नागरिक समाजकी सहजकर्ता रीता दाहालले बताउनुभयो ।
कार्यक्रममा “ज्येष्ठ नागरिकको सम्मान गरौँ, आदर्श समाजको निर्माण गरौँ” भन्ने मूल नाराका साथ कार्यक्रमका प्रमुख अतिथि सुन्दरहरैंचा नगरपालिका–३ का वडाध्यक्ष विदुर ढुंगानालगायतले सम्मान गर्नुभएको थियो ।
कार्यक्रम ज्येष्ठ नागरिक सेवा समाज नेपाल, सुन्दरहरैंचा–३ का अध्यक्ष भीमबहादुर कार्कीको अध्यक्षतामा सम्पन्न भएको थियो ।
