इटहरी । फिफा विश्वकप २०२६ को आफ्नो पहिलो खेलमा चेक रिपब्लिकलाई २–१ गोल अन्तरले दक्षिण कोरियाले पराजित गरेको छ ।
आज बिहान मेक्सिकोको ग्वाडालजारा रंगशालामा भएको खेलमा मध्यान्तरपछिको १४ मिनेटभित्र दुई गोल फर्काउँदै कोरियाले जीत हासिल गरेको हो ।
मध्यान्तरपछि ५९ औं मिनेटमा लादिस्लाभ क्रेज्की गोल गर्दै चेक रिपब्लिकलाई अग्रता दिलाएका थिए । त्यसको ८ मिनेटपछि दक्षिण कोरियाका ह्वाङ इनबियोमले ६७ औं मिनेटमा गोल गर्दै टोलीलाई बराबरीमा ल्याएका थिए । खेलको ८० औं मिनेटमा दक्षिण कोरियाले अग्रता लियो । खेलको ६९ औँ मिनेटमा मैदान प्रवेश गरेका ओएच ह्योङयुले ११ मिनेटपछि गोल गर्दै दक्षिण कोरियालाई २–१ को स्थितिमा पुर्याएका थिए । त्यसपछि दुवै तर्फबाट गोल हुन नसकेपछि दक्षिण कोरिया विजयी भएको थियो ।
दक्षिण कोरिया ३ अंक जोड्दै समूहको दोस्रो स्थानमा पुगेको छ । उद्घाटन खेलमा जीत हासिल गर्दै समान ३ अंक नै जोडे पनि गोलअन्तरका आधारमा मेक्सिको शीर्ष स्थानमा छ ।
उद्घाटन खेलमा दक्षिण अफ्रिकालाई २–० गोलले हराउँदै मेक्सिको पहिलो स्थानमा रहेको छ ।
विजेता नभए पनि १ गोल गरेको चेक रिपब्लिक अंकविहीन हुँदै तेस्रो स्थानमा र कुनै पनि गोल नगरेको दक्षिण अफ्रिका चौथो स्थानमा रहेका छन् ।
समूह ए को तेस्रो खेल असार ४ गते चेक रिपब्लिक र दक्षिण कोरियाबीच हुनेछ ।
प्रतियोगिताअन्तर्गत भोलि पहिलो खेल समूह डी मा रहेका अमेरिका र पाराग्वेबीच बिहान पौने ७ बजे र दोस्रो खेल दिउँसो पौने १ बजे समूह बी मा रहेका क्यानडा र बोस्नियाबीच हुनेछ ।
