गछियाः साजीलाल माध्यमिक विद्यालय सुन्दरहरैंचामा लामो समय शिक्षण गर्नुभएका सो विद्यालयका पूर्व प्रधानाध्यापक पीताम्बर दाहालले लेख्नुभएको कृति ‘अतीतदेखि वर्तमानसम्म’ एक कार्यक्रमका बीच विमोचन गरिएको छ ।
आइतबार सुन्दरहरैंचा–३ लक्ष्मीनारायण मन्दिरको सभाहलमा आयोजित कार्यक्रममा प्रमुख अतिथि तथा कृतिकारका विद्यार्थी प्रतिनिधि सभा सदस्य गुरु बराललगायतले कृतिको विमोचन गर्नुभएको हो ।
विमोचन समारोहलाई सम्बोधन गर्नुहुँदै प्रमुख अतिथि बरालले पीताम्बर सरको क्रान्तिकारिता र दूरदर्शिताको बारेमा व्याख्या गर्नुभएको थियो । वि. सं. २०२९ सालमा सरस्वती पूजा मनाउने क्रममा पुजारी छनोट विषयमा विवाद हुँदा तत्कालीन शिक्षक कृतिकार दाहालले खेल्नुभएको भूमिका महत्वपूर्ण रहेको बरालले स्मरण गर्नुभएको थियो ।
कार्यक्रमलाई सम्बोधन गर्नुहुँदै कृतिकारका विद्यार्थी तथा बेलबारी नगरपालिकाका नगरप्रमुख दिलप्रसाद राईले कृतिकार दाहालको अध्यापन सीप सबैका लागि प्रशंसनीय भएको बताउनुभयो ।
सुन्दरहरैंचा नगरपालिकाका नगरप्रमुख केदारप्रसाद गुरागाईँले आफूले दाहालसँग अध्ययन गर्ने मौका नपाए पनि उहाँको शिक्षण शैलीको बारेमा भने आफू जानकार रहेको बताउनुभयो ।
कृतिको समीक्षा गर्दै साजीलाल माविका पूर्व शिक्षक श्यामप्रसाद भट्टराईले कृतिले तत्कालीन समाजको चित्रण पनि गरेको बताउनुभयो ।
कार्यक्रममा उपस्थित एसएलसीको २०३६, २०३७, २०३८ र २०३९ सालको ब्याचका विद्यार्थीले कृतिकारलाई सम्मान गरेका थिए ।
