इटहरीः लायन्स वर्ष शुरु भएसँगै लायन्स क्लब अफ इटहरी ग्रीन सिटीले ‘ग्लोबल कज’ अभियानअन्तर्गत सामाजिक सेवाका कार्यक्रमलाई तीव्रता दिएको छ ।
जुलाई १ देखि लायन्स वर्ष शुरु हुन्छ । लायन्स वर्ष शुरु हुनासाथ क्लबले रक्तदान, वृक्षरोपण, शैक्षिक सामग्री वितरण तथा खानेपानी व्यवस्थापनजस्ता सामाजिक उत्तरदायित्वका कार्यक्रमलाई निरन्तरता दिएको हो ।
लायन्स इन्टरनेशनल डिस्ट्रिक्ट ३२५ सी अन्तर्गत एरिया–४ ले आयोजना गरेको बृहत् रक्तदान कार्यक्रममा सक्रिय सहभागिता जनाएको क्लबले सोही दिन इटहरीस्थित डीभीएम स्कुल परिसरमा वृक्षरोपणसमेत गरेको थियो ।
क्लबले उदयपुरको कटारीस्थित कालिका आधारभूत विद्यालयका ८५ जना विद्यार्थीलाई विद्यालय झोला र स्टेशनरी सामग्री वितरण गरेको थियो । क्लबकी पूर्वअध्यक्ष हेमा तामाङ गुरुङको जन्मदिनको अवसर पारेर विद्यालयमा शुद्ध खानेपानीको लागि आरओ प्लान्टसमेत हस्तान्तरण गरिएको थियो ।
क्लबका अध्यक्ष ओमप्रकाश वनले लायन्स वर्षभर यस्ता सामाजिक तथा मानवीय सेवामूलक कार्यक्रमलाई निरन्तर सञ्चालन गर्ने प्रतिबद्धता जनाउनुभएको छ । लायन्सले इटहरी–१० स्थित शिवालय मन्दिर परिसर तथा साकेला थान क्षेत्रमा पनि वृक्षरोपण गरेको छ ।
