विराटचोकः आजदेखि सुन्दरहरैंचाको विराटचोकमा नेपाल स्काउट स्थानीय समिति सुन्दरहरैंचाको आयोजना तथा हिमालय इङ्लिस स्कुल, सुन्दरहरैंचा १० को सहआयोजना एवं व्यवस्थापनमा ‘हिमालय मनसुन स्काउट क्याम्प २०८३’ शुरु भएको छ ।
‘प्रकृतिसँग सङ्गत, स्काउटिङको जगत’ भन्ने नारासहित साउन १ देखि ३ गतेसम्म सञ्चालन हुने क्याम्पमा नगरका विभिन्न विद्यालयका ५० भन्दा बढी स्काउट विद्यार्थी सहभागी भएको आयोजकले जनाएको छ ।
क्याम्पको सुन्दरहरैंचा नगरपालिकाका नगरप्रमुख केदारप्रसाद गुरागाईँले स्काउटले विद्यार्थीमा अनुशासन सिकाउनुका साथै घरबाहिरको वातावरणमा घुलमिल हुन सहयोग गर्ने बताउनुभयो ।
विद्यार्थीमा अनुशासन, नेतृत्व, आत्मनिर्भरता, सेवाभाव र सामाजिक उत्तरदायित्व विकास गर्न सहयोग पुग्ने कार्यक्रमका अतिथिहरुले बताउनुभयो ।
क्याम्पमा प्राथमिक उपचार, विपद् व्यवस्थापन, क्याम्प क्राफ्ट, गाँठो बाँध्ने कला, टोली नेतृत्व, वातावरण संरक्षण, सरसफाइ तथा अन्य व्यवहारिक प्रशिक्षण सञ्चालन हुने आयोजकले जनाएको छ ।
उद्घाटन कार्यक्रम स्थानीय स्काउट प्रमुख आयुक्त मनोज लामा कार्कीको अध्यक्षतामा भएको थियो । नगर प्रमुख केदार प्रसाद गुरागाईं प्रमुख अतिथि तथा हिमालय इङ्लिस स्कुलका संस्थापक प्रिन्सिपल कमल खनाल विशेष अतिथि रहेका थिए । हिमालय स्काउट ट्रुपका प्रमुख सुजन थापाले संयोजन गरेको कार्यक्रममा नेसनल प्याब्सन सुन्दरहरैंचाका अध्यक्ष भीम अधिकारी र आप्रवासी महिला कामदार समूह (आमकास) की मोरङ अध्यक्ष उमा सेढाईँले पनि आफ्नो भनाइ राख्नुभएको थियो ।
