इटहरीः चर्चित नाटक ‘पापशाला’ को सफल मञ्चन गर्दै विश्व आदर्श एकेडेमीले आफ्नो वार्षिक नाट्य महोत्सव मनाएको छ । इटहरीस्थित दुर्गा पार्टी प्यालेसमा साउन ३ र ४ गते नाथ मञ्चन गरिएको थियो ।
तीन हजारभन्दा बढी दर्शकको उल्लेखनीय उपस्थिति रहेको बताइएको महोत्सव विश्व आदर्श कलेजको आयोजना तथा साहित्यिक संस्था ‘लाभा’ को समन्वयमा भएको थियो । सो महोत्सवमा कलेजका पूर्वविद्यार्थी कलाकारहरूले सशक्त अभिनय गरेका थिए ।
नाटक मञ्चनको पहिलो चरण विद्यार्थी तथा शिक्षकका लागि आयोजना गरिएको थियो । दोस्रो चरण इटहरीका विभिन्न शैक्षिक संस्थाका प्राचार्य, शिक्षक, साहित्यकार, नाट्यकर्मी, अभिभावक र सर्वसाधारण दर्शकका लागि मञ्चन गरिएको आयोजकले जनाएको छ ।
नैतिकता, अपराधबोध, आत्मस्वीकार र मानवीय द्वन्द्वलाई प्रभावशाली ढङ्गले प्रस्तुत गरिएको नाटकले मनोरञ्जनसँगै जीवनप्रतिको गहिरो सन्देश दिएको भन्दै दर्शकहरूले खुलेर प्रशंसा गरेका थिए ।
‘पापशाला’ नाटक फ्रान्सेली दार्शनिक तथा साहित्यकार जाँ–पल सात्र्रको चर्चित कृतिबाट रूपान्तरण गरिएको नाटक हो । यसलाई सुगम दुलालले नेपाली परिवेशअनुकूल रूपान्तरण गरेका थिए भने निर्देशन प्रज्ज्वल दुलालले गरेका थिए । कर्भिका पोखरेल क्रिएटिभ डाइरेक्टर रहेको नाटकमा सुगम दुलाल, प्रज्ज्वल दुलाल, अविन ठटाल, लुमन्ती महर्जन र सुरभी प्याकुरेलले अभिनय गर्नुभएको थियो । संगीत संयोजन संगीत विश्वकर्माले गर्नुभएको थियो ।
एकेडेमीका प्राचार्य गणेश दुलालले इटहरीलाई साहित्य, कला र रंगमञ्चको उर्वर भूमि बनाउने लक्ष्यसहित वार्षिक नाट्य महोत्सवलाई निरन्तरता दिइने बताउनुभयो ।
