विराटचोकः शिक्षक तथा कर्मचारीले विद्यार्थीमाथि दुर्व्यवहार गरेको आरोपमा विद्यालयका ४ जना शिक्षक र कर्मचारी पक्राउ परेपछि अनुसन्धानमा विद्यालयले पूर्ण सहयोग गर्ने सुकुना माविले जनाएको छ ।
मोरङको सुन्दरहरैँचा नगरपालिका–१० स्थित सुकुना माध्यमिक विद्यालयले सामाजिक सञ्जालमा सार्वजनिक भएको यौनजन्य दुव्र्यवहारसम्बन्धी घटनामा कानुनी अनुसन्धानका लागि पूर्ण सहयोग गरिरहेको विद्यालयले जनाएको छ ।
निष्पक्ष छानबिनबाट पीडितले न्याय र दोषीले कानुनअनुसार सजाय पाउनुपर्ने विद्यालयको स्पष्ट धारणा रहेको भनी बुधबार विद्यालयले प्रेस विज्ञप्ति जारी गरेको छ ।
सो विज्ञप्तिमा सामाजिक सञ्जालमा सञ्चालित ‘एसकेएन कन्फेसन मिम’ समूहमार्फत् सार्वजनिक भएका विषयप्रति विद्यालयको गम्भीर ध्यानाकर्षण भएको उल्लेख गरिएको छ । घटनाको सत्यतथ्य निष्पक्ष अनुसन्धानबाट बाहिर आउनुपर्ने र त्यसका आधारमा कानुनी प्रक्रिया अघि बढ्नुपर्ने विद्यालयको भनाइ छ ।
निमित्त प्रधानाध्यापक राजेन्द्रप्रसाद गिरी, शिक्षक–अभिभावक संघका अध्यक्ष खगेन्द्रप्रसाद घिमिरे र विद्यालय व्यवस्थापन समितिका अध्यक्ष गणेशकुमार कार्कीको संयुक्त हस्ताक्षरमा जारी विज्ञप्तिमा आरोप लागेका शिक्षक तथा कर्मचारीलाई तत्काल निलम्बन गरिएको र सम्बन्धित निकायबाट भइरहेको अनुसन्धानमा विद्यालयले आवश्यक सहयोग गरिरहेको उल्लेख छ । अनुसन्धानको निष्कर्षलाई धैर्यपूर्वक पर्खिरहेको पनि विद्यालयले जनाएको छ ।
अनुसन्धान चलिरहेको समयमा प्रमाण र तथ्यबिना सामाजिक सञ्जालमार्फत् शिक्षक तथा कर्मचारीमाथि विभिन्न आरोप लगाउने, चरित्रहत्या गर्ने तथा संस्थाको प्रतिष्ठामा आँच पुर्याउने गतिविधिप्रति दुःख व्यक्त गरेको छ । यस्ता गतिविधिले अनुसन्धान प्रक्रियामा असर पर्न सक्ने भन्दै संयम अपनाउन सबै पक्षसँग आग्रह गरिएको छ ।
घटनाका कारण पठनपाठन प्रभावित हुन नदिन तथा विद्यार्थीलाई नियमित रूपमा विद्यालय पठाइदिन अभिभावक, बुद्धिजीवी, समाजसेवी, जनप्रतिनिधि तथा राजनीतिक दलका प्रतिनिधिसँग विद्यालयले अपिल गरेको छ । घटनाको विषय बाहिर ल्याउने फेसबुक पेजलाई विद्यालयले धन्यवाद पनि दिएको छ ।
सुकुना माध्यमिक विद्यालयमा पाँच हजारभन्दा बढी विद्यार्थी अध्ययनरत रहेका छन् भने १७८ जना शिक्षक तथा कर्मचारी कार्यरत छन् ।
