धनकुटाः धनकुटाको तल्लो टुँडिखेल पुनः सञ्चालन हुने भएको छ । जिल्ला खेलकुद विकास समितिले शनिबारदेखि मैदानको सरसफाइ तथा व्यवस्थापन अभियान थालेसँगै खेलाडी र खेलप्रेमीका लागि मैदान खुलाउने प्रक्रिया अघि बढाइएको हो ।
जिल्लाको प्रमुख खेलमैदानका रूपमा रहेको टुँडिखेलमा सशस्त्र प्रहरी, नेपाली सेना, पूर्वखेलाडी, वर्तमान खेलाडी तथा स्थानीयवासीको सहभागितामा सरसफाइ अभियान सञ्चालन भएको हो । मैदानमा बढेको घाँस–झार हटाउने, सतह सफा गर्ने र खेल सञ्चालनका लागि उपयुक्त बनाउने काम भइरहेको जनाइएको छ ।
जिल्ला खेलकुद विकास समितिका अध्यक्ष मनोज चाम्लिङ राईले केही दिन सरसफाइ गरेपछि सामान्य मर्मतसम्भार गरी मैदान खेल गतिविधिका लागि खुला गरिने बताउनुभयो । अहिले मैदानमा दुबो विस्तार, सतह सम्याउने र नियमित सरसफाइलाई प्राथमिकता दिइएको छ ।
आगामी दिनमा प्रवेश तथा प्रयोगसम्बन्धी मापदण्ड बनाएर व्यवस्थित रूपमा सञ्चालन गर्ने तयारी रहेको जनाइएको छ । टुँडिखेल बन्द हुँदा विद्यालयस्तरीय फुटबल प्रशिक्षण, भलिबल अभ्यास, एथलेटिक्सलगायत खेल गतिविधि प्रभावित भएका थिए ।
