लेटाङः चिसाङ फुटबल क्लब, लेटाङको आयोजनामा लेटाङ–६ स्थित सुकेचौरी खेलमैदानमा सम्पन्न दोस्रो एसईई कप २०८३ को फाइनलमा बेलबारी फुटबल क्लबले खेरुवा फुटबल क्लबलाई २–१ गोल अन्तरले पराजित गर्दै उपाधि जितेको छ ।
उपाधि जितेसँगै बेलबारी एफसीले नगद ३० हजार रुपैयाँसहित ट्रफी र मेडल प्राप्त गरेको छ भने उपविजेता खेरुवा एफसीले नगद २० हजार रुपैयाँसहित ट्रफी र मेडल प्राप्त गरेको छ ।
प्रतियोगितामा उत्कृष्ट प्रदर्शन गर्ने खेलाडीहरूलाई समेत विभिन्न विधागत पुरस्कार प्रदान गरिएको खेल संयोजक आशिष राईले जानकारी दिनुभयो ।
स्थानीय युवा खेलाडीहरूको प्रतिभा पहिचान तथा फुटबल खेलको विकास गर्ने उद्देश्यले आयोजना गरिएको आयोजकले जनाएको छ ।
‘स्वच्छ खेल, उज्यालो भविष्य’ भन्ने नारासहित सञ्चालन भएको प्रतियोगितामा बेलबारीले उत्कृष्ट प्रदर्शन गर्दै उपाधि आफ्नो पक्षमा पारेको हो । प्रतियोगितामा आठ टोलीको सहभागिता रहेको थियो ।
