इनरुवाः सुनसरीको देवानगञ्ज गाउँपालिका–३, कप्तानगञ्जमा साउन १० गते भएको घटनामा उपचारका क्रममा मृत्यु भएका रवीन्द्रकुमार मेहताको परिवार र नेपाल सरकारबीच सात बुँदे सहमति भएको छ ।
गृहमन्त्री सुधन गुरुङ र मृतक मेहताका अभिभावकबीच सोमबार भएको सहमतिअनुसार मेहतालाई शहीद घोषणा गर्ने प्रक्रिया तत्काल अघि बढाइने भएको हो । सो घटनाको निष्पक्ष तथा प्रभावकारी छानबिन गरी दोषी देखिएकामाथि प्रचलित कानुनबमोजिम कारबाही प्रक्रिया अघि बढाइने भएको छ ।
घटनासँग जोडिएको देवानगञ्ज–३ स्थित मदरसाको कानुनी हैसियत तथा सम्बन्धित विषयमा समेत आवश्यक छानबिन तत्काल सुरु गर्ने सहमति भएको छ । सरकारले मृतक मेहताका परिवारका एक जना योग्य सदस्यलाई रोजगारी उपलब्ध गराउन आवश्यक पहल गर्ने सहमति पनि भएको छ ।
घटनाको अध्ययनका लागि गठित छानबिन समितिले पेश गर्ने प्रतिवेदनका सुझाव तथा सिफारिशलाई प्रचलित कानुनबमोजिम कार्यान्वयन गर्न आवश्यक प्रक्रिया अघि बढाइने सहमतिमा उल्लेख छ ।
उनको शव नेपाली सेनाको हेलिकोप्टरमार्फत् देवानगञ्ज गाउँपालिका–३, सुनसरी लगेर मृतकको दाहसंस्कार गरिने भएको छ । घटनामा मृत्यु भएका तीनै जनाको स्मृतिमा गाउँपालिकाको उपयुक्त स्थानमा स्मृति पार्क निर्माण गर्ने सहमति पनि भएको छ । त्यसका लागि स्थानीय सरकारसँग समन्वय गरी चालु आर्थिक वर्षमै बजेट विनियोजन गर्ने सहमति सरकार र मृतक परिवारबीच भएको छ ।
