लेटाङः लेटाङ नगरपालिका–७, वारंगीस्थित ‘होटल चेल्सिया एण्ड ट्रेडर्स’ मा आइतबार भएको आगलागीबाट भएको क्षतिको नगर उपप्रमुख कृष्णकुमारी निरौलाले सोमबार स्थलगत निरीक्षण गर्नुभएको छ ।
नगर उपप्रमुख निरौलाको नेतृत्वमा वडाध्यक्षहरू सम्मिलित टोलीले वारांगी पुगेर निरीक्षण गरेको हो । नगर प्रमुख भुपेन्द्रकुमार लावती काठमाडौँमा रहेकाले उहाँको अनुपस्थितिमा उपप्रमुख निरौलाले आगलागीबाट पीडित परिवारलाई भेटी तत्कालका लागि आवश्यक राहत सामग्री हस्तान्तरण गर्नुभएको हो ।
प्रारम्भिक अनुमान अनुसार आगलागीबाट करीब ७ करोड रुपैयाँ बराबरको भौतिक क्षति भएको जनाइएको छ । अकल्पनीय विपद्प्रति गहिरो दुःख व्यक्त गर्दै उपप्रमुख निरौलाले पीडित परिवारलाई थप सहयोग गर्ने प्रतिबद्धता व्यक्त गर्नुभएको छ । आगामी कार्यपालिका बैठकबाट निर्णय गराई थप राहत उपलब्ध गराउने तथा घर पुनर्निर्माणका लागि जिल्ला विपद् व्यवस्थापन समिति र प्रदेश सरकारसँग समेत आवश्यक समन्वय गर्ने पनि उहाँले जानकारी दिनुभयो ।
आगलागीको कारणबारे थप अनुसन्धान भइरहेको र क्षतिको यकिन विवरण सङ्कलन गर्ने कार्य जारी रहेको जनाइएको छ । आइतबार दिउँसो भएको आगलागीबाट लेटाङ ७ वारांगीमा रहेको फमकुमार मगरको घर र सो घर भाडामा लिएर टीका धितालले सञ्चालन गरेको पसल पूर्ण रूपमा जलेर नष्ट भएका थिए ।
