सलकपुरः निवृत्त राष्ट्रसेवक समाज, नेपाल सुन्दरहरैंचा नगरसमितिको छैटौँ नगर अधिवेशनमा ‘सेवानिवृत्तहरूको संगालो’ पुस्तक सार्वजनिक गरिएको छ ।
बुधबार आयोजित कार्यक्रममा प्राध्यापक, शिक्षक, निजामती कर्मचारी, नेपाली सेना, नेपाल प्रहरी, न्यायसेवा तथा विभिन्न संघसंस्थाबाट सेवानिवृत्त राष्ट्रसेवकहरूको सहभागिता रहेको थियो ।
सो साधारणसभामा संस्थाका अध्यक्ष उमाकान्त चौलागाईंले नगर कार्यसमितिले आफ्नो कार्यकालमा गरेका विभिन्न गतिविधि तथा प्रगति विवरण प्रस्तुत गर्दै निवृत्त राष्ट्रसेवकहरूको ज्ञान, सीप र अनुभवलाई समाज तथा राष्ट्र निर्माणमा उपयोग गर्नुपर्नेमा जोड दिनुभएको थियो ।
सो पुस्तकमा सुन्दरहरैंचा क्षेत्रका विभिन्न सेवाबाट निवृत्त भएका व्यक्तिहरूका अनुभव, योगदान, परिचय तथा संस्मरणलाई समेटिएको जनाइएको छ ।
अधिवेशनका क्रममा संस्थाको आगामी कार्ययोजना, सङ्गठन सुदृढीकरण तथा निवृत्त राष्ट्रसेवकहरूबीच आपसी समन्वय र सहकार्यका विषयमा समेत छलफल गरिएको थियो ।
