इटहरीः सङ्गीतकार संघ नेपालले इटहरीका सङ्गीत साधक तथा सङ्गीत अभियानकर्मी राजु केसीलाई ‘सङ्गीतकार विशेष सम्मान–२०८३’ प्रदान गरेको छ ।
संघको कार्यालयमा प्रमुख अतिथि राष्ट्रिय स्वतन्त्र पार्टी (रास्वपा) को संसदीय दलका सचेतक प्रकाशचन्द्र परियारले केसीको योगदानको कदर गर्दै सम्मान–पत्रसहित सम्मान गर्नुभएको थियो ।
सचेतक परियारले नेपाली सङ्गीतका साधक तथा स्रष्टाको अधिकार, हकहित र राज्यबाट पाउनुपर्ने उचित सम्मान सुनिश्चित गर्न आवश्यक ऐन, कानुन तथा नीतिगत व्यवस्थाका लागि आफूले पहल गर्ने प्रतिबद्धता व्यक्त गर्नुभएको थियो ।
उहाँले नेपाली कला, सङ्गीत र संस्कृतिको संरक्षण, प्रवद्र्धक तथा सर्जकका सिर्जनाको अभिलेखीकरण आवश्यक रहेको बताउनुभयो । कला, संस्कृति र सङ्गीतको समृद्धिबिना समाजको चेतना र समग्र विकास पूर्ण हुन नसक्ने उहाँको भनाई थियो ।
संघका अध्यक्ष अष्ट लामाको अध्यक्षतामा भएको कार्यक्रममा संघका पदाधिकारी, सङ्गीतकर्मी तथा कला–संस्कृति क्षेत्रका व्यक्तिहरूको उपस्थिति थियो ।
