काठमाडौंः भोटेकोशी बाढी प्रभावित क्षेत्रबाट पोस्टमार्टमका लागि काठमाडौं ल्याइएका ११४ शवमध्ये हालसम्म १३ जनाको मात्रै सनाखत भएको छ ।
रसुवा, नुवाकोट र धादिङलगायत बाढी प्रभावित क्षेत्रबाट संकलन गरिएका शव त्रिवि शिक्षण अस्पताल महाराजगञ्जमा ल्याइएको थियो । काठमाडौँ प्रहरीका अनुसार पहिचान खुलेका १३ मध्ये १२ शव परिवारले बुझेर अन्त्येष्टि गरिसकेका छन् ।
पहिचान हुन नसकेका शवमध्ये ४६ वटालाई काठमाडौंको गोकर्णेश्वर नगरपालिका–७ स्थित दक्षिणढोका जङ्गल क्षेत्रमा सुरक्षित रूपमा व्यवस्थापन गरिएको छ । स्थानीय प्रशासनको निर्णयपछि ती शवलाई आवश्यक कानुनी तथा फरेन्सिक प्रक्रिया पूरा गरेर व्यवस्थापन गरिएको जनाइएको छ ।
व्यवस्थापन गर्नुअघि प्रत्येक शव तथा प्राप्त अवशेषबाट डीएनए नमूना सङ्कलन गरिएको छ । सम्भव भएसम्म फिंगरप्रिन्ट र आवश्यक तस्बिरसमेत सुरक्षित राखिएको प्रशासनले जनाएको छ ।
