काठमाडौंः नेपाल खेलकुद पत्रकार मञ्च (एनएसजेएफ) ले काठमाडौंमा आयोजना गरेको २३ औँ संस्करणको एनएसजेएफ पल्सर स्पोर्टस् अवार्ड २०८२ को उत्कृष्ट खेलाडी बक्सिङका चन्द्रबहादुर थापा मगर र करातेकी एरिका गुरुङ घोषित हुुनुभएको छ ।
हिजो आयोजित कार्यक्रममा चन्द्रबहादुरलाई वर्ष उत्कृष्ट पुरुष र एरिकालाई वर्ष उत्कृष्ट महिला खेलाडीको अवार्ड प्रदान गरिएको हो ।
दुबईमा सम्पन्न आइबा पुरुष विश्व च्याम्पियनसिपमा कास्य पदक जित्दै इतिहास रचेका चन्द्रबहादुर विश्व बक्सिङमा पदक जित्ने पहिलो नेपाली बक्सर खेलाडी हुनुहुन्छ ।
एरिकाले लगातार तेस्रोपटक वर्ष उत्कृष्ट महिला खेलाडीको अवार्ड जित्नुभएको हो । उहाँले विभिन्न अन्तर्राष्ट्रिय कराते प्रतियोगितामा स्वर्ण, रजत र कास्य पदक जित्नुभएको छ ।
करातेकी मनिषाकुमारी बोहरा वर्ष उत्कृष्ट युवा खेलाडी तथा कराते प्रशिक्षक कुशल श्रेष्ठ उत्कृष्ट प्रशिक्षक घोषित हुनुभएको छ । श्रेष्ठले पनि लगातार तेस्रो पटक यो अवार्ड जित्नुभएको हो ।
भलिबलकी मीना सुनारले पिपल्स च्वाइस अवार्ड जित्नुभएको छ । उहाँले कुल मतमध्ये २९.४ प्रतिशत पाउनुभएको थियो ।
सुष्मा तामाङलाई पारा एथलिट सम्मान, ध्रुवविक्रम मल्ललाई स्पेसल अवार्ड र पूर्वब्याडमिन्टन खेलाडी मोहनबहादुर शाहीलाई लाइफटाइम एचिभमेन्ट अवार्ड प्रदान गरियो । एसियन स्पोर्टस् जर्नालिस्ट अवार्ड भारतका सबा नायकनले पाउनुभयो ।
पाँचै विधाका मुख्य पुरस्कार विजेतालाई पल्सर मोटरसाइकल प्रदान गरिएको छ । अन्य सम्मानितलाई जनही एक लाख रुपैयाँ पुरस्कार दिइएको छ ।
