इटहरीः राष्ट्रिय माध्यमिक विद्यालय तथा स्काउट ट्रुपको आयोजनामा स्काउट विद्यार्थीहरूको शारीरिक, मानसिक तथा व्यावहारिक ज्ञान अभिवृद्धि गर्ने उद्देश्यले आयोजित गाँठो प्रतियोगिता सम्पन्न भएको छ ।
विद्यालयको प्राङ्गणमा भएको प्रतियोगिता विद्यालयका प्रधानाध्यापक तथा ट्रुप कमिटी अध्यक्ष शरणकुमार बस्नेतको सभापतित्व र विद्यालय व्यवस्थापन समिति अध्यक्ष एवं इटहरी उपमहानगरपालिका–१ का वडाध्यक्ष रतन कार्कीको प्रमुख आतिथ्यतामा भएको थियो ।
कार्यक्रममा आमा समूहकी अध्यक्ष जुनु गेलाल, सहायक प्रधानाध्यापक लक्ष्मीप्रसाद सुवेदी, यमुना बस्नेत, इटहरी युथ ओपन क्र्युका अध्यक्ष फणीन्द्रप्रसाद दाहाल, रोभर लिडर डिल्लीकुमार शर्मा लगायत विभिन्न स्काउटर तथा शिक्षकहरूको उपस्थिति थियो ।
स्काउटर वन्दना दाहाल बस्नेतको संयोजकत्वमा सम्पन्न प्रतियोगितामा स्काउटरहरू गोविन्द गडेरी, धीरेन शाह र अजय मण्डलले मुख्य निर्णायकको भूमिका निर्वाह गर्नुभएको थियो ।
निर्णायकहरूको मूल्याङ्कनका आधारमा जनसहयोग स्काउट ट्रुप प्रथम, कबिर स्काउट ट्रुप द्वितीय, सनराइज स्काउट ट्रुप तृतीय तथा कोसी सेन्ट जेम्स स्काउट ट्रुपले सान्त्वना स्थान हासिल गरेका थिए ।
कार्यक्रममा स्काउटरहरू प्रशान्त दाहाल, दिलीप चौधरी, रविन थापा, शारदा दाहाल, नारायण खवास, अच्युत निरौला, ग्रीन क्लब संयोजक लक्ष्मण घिमिरे तथा शिक्षकहरू सम्पत चौधरी र कल्याण दाहाललगायतको सहभागिता थियो ।
प्रतियोगितामा इटहरी युथ ओपन क्र्युका रोभर तथा रेन्जरहरूको उल्लेख्य सहभागिता रहेको थियो ।
