काठमाडौं । नेपाल प्रिमियर लिग (एनपीएल) अन्तर्गत आज सोमबार दुई खेलहरू हुँदैछन् ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने पहिलो खेलमा काठमाडौं गोर्खाज र कर्णाली याक्स तथा दोस्रो खेलमा सुदूरपश्चिम रोयल्स र चितवन राइनोजबीच प्रतिस्पर्धा हुनेछ ।
पहिलो खेल दिउँसो साढे १२ र दोस्रो खेल साँझ ५ बजे शुरु हुनेछ ।
प्रतियोगितामा काठमाडौं आफ्नो पहिलो जीतको खोजीमा रहने छ । यसअघि खेलेको पहिलो खेलमा काठमाडौं जनकपुर बोल्ट्ससँग पराजित भएको थियो ।
कर्णाली याक्स लगातार तेस्रो जीतको खोजीमा हुनेछ । यसअघिका दुवै खेल कर्णालीले जितेको थियो । कर्णालीले जनकपुर बोल्ट्स र विराटनगर किंग्सलाई हराएको थियो ।
सुदूरपश्चिम रोयल्सका लागि आजको खेल निकै महत्त्वपूर्ण मानिएको छ । सुदूरपश्चिमले हालसम्म खेलेका ३ खेलमध्ये १ खेलमा जीत र २ खेलमा हार व्यहोरेको छ ।
चितवन भने प्रतियोगितामा अहिलेसम्म अपराजित छ । पहिलो खेलमा जीत हात पारेको चितवनको दोस्रो खेल वर्षाका कारण रद्द भएपछि अङ्क बाँड्नु परेको थियो । जसका कारण आज चितवन पुनः अपराजित यात्रा गर्न चाहन्छ ।
