काठमाडौं – देशभर पश्चिमी वायु र स्थानीय वायुको आंशिक प्रभाव रहँदा कोशी प्रदेशमा बंगालको खाडीमा विकसित चक्रवात "दाना" को आंशिक असर परेको मौसम पूर्वानुमान महाशाखाले जनाएको छ।
हाल कोशी र लुम्बिनी प्रदेशका पूर्वी क्षेत्रहरूमा आंशिकदेखि सामान्य बादल छाए पनि देशका अन्य भागहरूमा मौसम मुख्यतया सफा छ। महाशाखाका अनुसार आज दिउँसो कोशी र लुम्बिनी प्रदेशका साथै पहाडी क्षेत्रका एकदुई स्थानमा मेघ गर्जन र चट्याङ्गसहित हल्का वर्षा हुनसक्ने सम्भावना रहेको छ।
यसैगरी, रातिको समयमा पनि कोशी, कर्णाली, र सुदूरपश्चिम प्रदेशका पहाडी क्षेत्रमा एकदुई स्थानमा मेघ गर्जन र चट्याङ्गसहित हल्का वर्षा हुनसक्ने जानकारी दिइएको छ।
मौसम पूर्वानुमान महाशाखाले जनताको सुरक्षा र सतर्कताका लागि सजग रहन अनुरोध गरेको छ।
