विराटचोकः पुष्पदर्शन बचत तथा ऋण सहकारी संस्थाको २० औँ वार्षिक साधारणसभा शनिबार इन्द्रपुर जेसीज मंगल स्मृति प्रतिष्ठानको सभाहलमा सम्पन्न भएको छ ।
संस्थाका अध्यक्ष डोलेश्वर तिम्सिनाको सभापतित्वमा भएको कार्यक्रममा ज्येष्ठ शेयर सदस्य आनन्दप्रसाद शाहको प्रमुख आतिथ्यता रहेको थियो । कार्यक्रममा संस्थाका सचिव ध्रुवप्रसाद दाहालले आर्थिक वर्ष २०८२÷०८३ को प्रगति विवरण तथा चालु आर्थिक वर्षको कार्ययोजना प्रस्तुत गर्नुभएको थियो ।
१ हजार ५ सय ७२ शेयर सदस्य रहेको संस्थाको शेयर रकम २ करोड १९ लाख ९७ हजार रुपैयाँ पुगेको छ । संस्थामा कुल बचत ९ करोड ४ लाख ५९ हजार ९ सय ९१ रुपैयाँ रहेको छ । त्यस्तै, कोषमा २ करोड १२ लाख ११ हजार १ सय ९७ रुपैयाँ र ऋण लगानी ९ करोड २० लाख ७८ हजार २ सय ५८ रुपैयाँ रहेको प्रतिवेदनमा उल्लेख छ ।
साधारणसभाका अवसरमा विभिन्न विधामा उत्कृष्ट हुने शेयर सदस्य तथा सदस्यका सन्तानलाई सम्मान गरिएको थियो । उत्कृष्ट मासिक बचतकर्तातर्फ देवीमाया घिमिरेलाई सम्मान गरिएको छ । यसैगरी असल ऋणीतर्फ वीरेन्द्र थारू र रीता बुढाथोकी, बाल बचततर्फ लेहना दाहाल तथा ज्येष्ठ सदस्यतर्फ सुभद्रा मास्के र डिल्लीप्रसाद कोइरालालाई सम्मान गरिएको थियो ।
कक्षा १२ मा उत्कृष्ट नतिजा ल्याउने शेयर सदस्यका छोराछोरीतर्फ सौगात सुवेदी र प्रियाकुमारी गुप्तालाई सम्मान गरिएको थियो । उनीहरूलाई संस्थाका अध्यक्ष तिम्सिना र प्रमुख अतिथि शाहले संयुक्त रूपमा सम्मान गर्नुभएको थियो ।
संस्थाकी उपाध्यक्ष पुष्पा तिम्सिनाले स्वागत मन्तव्य व्यक्त गर्नुभएको थियो ।
