‘रेडियोले बदलिँदो विश्वलाई जोड्दै’ नाराका साथ आज विश्वभर १३औँ विश्व रेडियो दिवस विभिन्न चेतनामूलक कार्यक्रम गरी मनाइँदैछ। संयुक्त राष्ट्रसङ्घीय शैक्षिक, वैज्ञानिक तथा सांस्कृतिक सङ्गठन (युनेस्को) को आह्वानमा जलवायु परिवर्तनका असरबारे सचेतना फैलाउने उद्देश्यले यो दिवस विशेष कार्यक्रमसहित मनाइँदैछ।
सन् २०११ मा युनेस्कोका सदस्य राष्ट्रहरूले फेब्रुअरी १३ लाई अन्तर्राष्ट्रिय रेडियो दिवसका रूपमा मनाउने प्रस्ताव गरे पनि राष्ट्रसङ्घीय महासभाले २०१२ मा अनुमोदन गरेपछि औपचारिक रूपमा यो दिवस मनाउन थालिएको हो।
रेडियो आमसञ्चारको सबैभन्दा प्रभावकारी माध्यम मानिन्छ, जसले समाजका विविधतासहित एकता कायम गर्न, आवाजविहीनहरूको आवाज बन्न, लोकतान्त्रिक बहसलाई प्रवर्द्धन गर्न तथा शिक्षा, सूचना र मनोरञ्जन प्रदान गर्न महत्त्वपूर्ण भूमिका निर्वाह गर्दै आएको छ। विपत्तिका बेला तथा दुर्गम भेगका नागरिकहरूलाई सूचनामूलक सामग्री उपलब्ध गराउने रेडियोको योगदान अतुलनीय छ।
नेपालमा पनि रेडियो सञ्चारको प्रमुख स्रोतका रूपमा स्थापित छ। २००७ सालमा रेडियो नेपालको प्रसारण सुरू भएदेखि अहिलेसम्म आइपुग्दा थुप्रै एफएम स्टेसनहरू सञ्चालनमा आएका छन्, जसले स्थानीय समुदायलाई नजिक ल्याउन सहयोग पुर्याइरहेका छन्।
रेडियो क्षेत्रका विज्ञहरूका अनुसार प्रविधिको विकाससँगै डिजिटल रेडियो तथा अनलाइन रेडियोको विस्तार भए पनि परम्परागत एफएम तथा एएम रेडियोको प्रभाव घटेको छैन। जनताको सहज पहुँच, कम खर्चिलो प्रविधि तथा सरल प्रयोगका कारण रेडियो अझै पनि सबैभन्दा बढी लोकप्रिय माध्यम रहेको छ।
यस वर्षको विश्व रेडियो दिवसको अवसरमा नेपालभर विभिन्न रेडियो स्टेशनहरूले विशेष कार्यक्रम, रेडियो वार्ता, जलवायु परिवर्तनसम्बन्धी सचेतनामूलक प्रसारण तथा नागरिक संवादका कार्यक्रम आयोजना गरिरहेका छन्।
