एजेन्सी । हङकङको ताईपोस्थित वाङफुक कोर्टमा बुधबार भएको भीषण आगलागीमा परी मृत्यु हुनेको संख्या ९४ पुगेको छ। मृत्यु हुनेमा एक जना अग्निनियन्त्रक समेत छन् ।अझै करिब ३०० जना बेपत्ता रहेको बीबीसीले जनाएको छ । घटनामा ११ अग्निनियन्त्रकसहित ७६ जना घाइते भएकोमा अझै ५६ जना अस्पतालमा रहेका छन् ।
बुधबार ताईपो जिल्लाका आठ भवनमध्ये सातमा आगो फैलिएको थियो।हङकङका नेताले आगो अहिले नियन्त्रणमा आएको बताएका छन्।सुरक्षा कमजोरी गरिएको भन्दै अहिले त्यहाँका बासिन्दामा आक्रोश छ।आगलागीका बेला त्यहाँ कति जना थिए भन्ने कुरा अझै स्पष्ट भएको छैन।
हालैको तथ्यांकअनुसार, त्यहाँ ४ हजार ६०० जनाको हाराहारीमा मानिस बस्थे।आगलागी कसरी सुरु भयो भन्ने विषयमा पत्ता लाग्न बाँकी नै छ। अधिकारीहरूले यसको अनुसन्धान सुरु गरेका छन्।प्रहरीले भवनको बाहिरी भागमा प्रयोग गरिएको सामग्री अग्निप्रतिरोधी नभएको बताएको छ।यसैबीच हङकङका नेता जोन ली का–च्युले नवीकरण भइरहेका सबै प्रमुख सार्वजनिक आवासको निरीक्षण गर्न आदेश दिएका छन्।
