काठमाडौंः सरकारले काठमाडौ उपत्यकामा घरायसी उपभोक्तालाई एलपी ग्यासको आपूर्ति सहज बनाउन व्यावसायिक प्रयोजनका लागि ग्यास बिक्रीमा तत्काल रोक लगाएको छ ।
नेपाल आयल निगमको निर्णयसँगै अब उपत्यकाका होटल, रेस्टुरेन्ट, उद्योग तथा अन्य व्यावसायिक प्रतिष्ठानले डिपो वा बिक्रेतामार्फत ग्यास खरिद गर्न पाउने छैनन् । उनीहरूले उपत्यकाबाहिरका ग्यास उद्योगबाट आवश्यक परिमाणमा ग्यास आफैं ढुवानी गरी ल्याउनुपर्ने भएको छ ।
घरायसी उपभोक्ताका लागि बजारमा ग्यासको उपलब्धता सुनिश्चित गर्न व्यावसायिक क्षेत्रको खपतलाई छुट्टै व्यवस्थापन गर्ने नीति लिइएको निगमले जनाएको छ ।
यो व्यवस्थाले उपत्यकाको ग्यास वितरण प्रणालीमा घरायसी र व्यावसायिक उपभोक्ताबीचको आपूर्तिलाई छुट्टाछुट्टै व्यवस्थापन हुने र विशेषगरी सीमित आपूर्तिका अवस्थामा ठूलो परिमाणमा ग्यास खपत गर्ने होटल तथा उद्योगका कारण घरायसी उपभोक्ताले ग्यास पाउन समस्या नहुने बताइएको छ ।
