काठमाडौंः विश्वमा सबैभन्दा धेरै इलेक्ट्रिक कार बिक्री गर्ने चिनियाँ कम्पनी बीवाईडीले चिनियाँ बजारमा आफ्नो नयाँ जेनेरेशनको ‘बीवाईडी अटो थ्री इलेक्ट्रिक एसयूभी सार्वजनिक गरेको छ । पुरानो मोडलको तुलनामा निकै एड्भान्स र शक्तिशाली बनाइएको यो नयाँ पुस्ताको मोडल लामो दूरीसम्म चल्नुका साथै यसमा लक्जरी फिचरहरू र उत्कृष्ट ड्राइभिङ अनुभवका लागि आधुनिक प्रविधिहरू पनि समावेश गरिएको बताइएको छ ।
चिनियाँ बजारमा चार भेरियन्टमा उपलब्ध ती कार ३ आफ्नो पुरानो पुस्ताको मोडलभन्दा ठूलो र अझ बढी मस्कुलर देखिने बताइएको छ । यसको लम्बाइ ४ हजार ६६५ मिमी, चौडाइ १ हजार ८९५ मिमी र उचाइ १ हजार ६७५ मिमी रहेको छ । यसमा २ हजार ७७० मिमीको ह्वीलबेस दिइएको र कम्पनीको ‘ड्रागन फेस’ डिजाइन रहेको नयाँ अटो थ्रीमा १८० लिटरको फ्रंक र ७५० लिटरको रियर बुट स्पेस उपलब्ध रहेको बताइएको छ ।
यसमा ठूलो फ्लोटिङ टचस्क्रिन (डीआई इन्टरफेससहित), दुई–स्पोक स्टेयरिङ ह्वील, १६ स्पिकर अडियो सिस्टम, ५० वाट वायरलेस चार्जिङ र प्यानोरामिक हेड–अप डिस्प्ले जस्ता फिचरहरू समावेश छन् । टप भेरियन्टमा लि डारमा आधारित डी पाइलट ३०० एडभान्स्ड ड्राइभिङ असिस्टेन्स सिस्टम पनि उपलब्ध छ, जसले सिटी नेभिगेसन र अटोमेटेड पार्किङ जस्ता सुविधा दिने जनाइएको छ ।
यसमा सेकेण्ड जेनेरेशनको ब्लेड ब्याट्री प्रविधि प्रयोग गरी ५७.५ किलोवाट आवर र ६८.५ किलोवाट आवरका दुईवटा ब्याट्री प्याक विकल्प उपलब्ध रहेको र जसले सिएलटीसी अनुसार क्रमशः ५४० किलोमिटर र ६३० किलोमिटरसम्मको रेन्ज प्रदान गर्ने जनाइएको छ ।
नयाँ बीवाईडी अटो थ्रीमा कम्पनीको नयाँ फ्ल्यास चार्जिङ प्रविधिको सपोर्ट पनि भएकाले गाडीलाई १० प्रतिशतदेखि ९७ प्रतिशतसम्म केवल ९ मिनेटमै चार्ज गर्न सकिने जनाइएको छ ।
