भोजराज घिमिरे - नेपालमा अविरल वर्षापछि आएको बाढी, पहिरो र डुबानका कारण मृत्यु हुनेको संख्या २०९ पुगेको छ। गृह मन्त्रालयले सोमबार साँझ दिएको जानकारीअनुसार, हालसम्म २९ जना अझै बेपत्ता छन् भने १४२ जना घाइते अवस्थामा उद्धार भएका छन्।
बाढी र पहिरोबाट देशभर ठूलो क्षति भएको छ। काभ्रे, ललितपुर, सिन्धुली लगायतका प्रभावित जिल्लाहरूमा उद्धारकार्यलाई तीव्र बनाइएको छ। हेलिकप्टरमार्फत ७१३ भन्दा बढी व्यक्तिहरूको उद्धार गरिएको छ, भने कुल ४,००० भन्दा बढी व्यक्तिहरूलाई सुरक्षित स्थानमा सारिएको छ। उद्धारकार्य निरन्तर भइरहेको र बेपत्ताहरूको खोजीकार्यलाई पनि तीव्रता दिइएको गृह मन्त्रालयले जनाएको छ।
सरकारले बाढी, पहिरो र डुबानका कारण घरबारविहीन भएकाहरूलाई सहयोग प्रदान गर्ने प्रयास जारी राखेको छ। संकटग्रस्त क्षेत्रमा राहत सामग्री वितरण भइरहेको छ भने उद्धार टोलीहरू सक्रिय रूपमा कार्यरत छन्।
मौसममा सुधार नभएसम्म जोखिम कायमै रहने अनुमान गरिएको छ, जसले गर्दा आगामी दिनमा थप चुनौतीहरूको सामना गर्नुपर्ने हुनसक्छ। सरकारले सर्वसाधारणलाई सचेत रहन आग्रह गर्दै सुरक्षित स्थानमा बस्न सुझाव दिएको छ।
