भोजराज घिमिरे
विराटनगर, असोज १३ – विराटनगर महानगरपालिकाको पश्चिमतर्फ रहेको केसलिया खोलामा तटबन्ध निर्माण हुने भएको छ। गत बुधबार रातिदेखि शनिबारसम्म परेको अविरल वर्षाका कारण महानगरको पश्चिम-दक्षिणी भाग डुबानमा परेको थियो। प्रत्येक वर्ष वर्षायाममा यो क्षेत्र डुबानमा पर्दै आएको छ, जसको मुख्य कारण केसलिया खोलाको पानी र महानगरको उत्तरतर्फबाट बगेर आउने पानी हो।
डुबानको समस्या रोकथामका लागि कोशी प्रदेश खानेपानी, सिंचाइ तथा ऊर्जा मन्त्रालयको सहयोगमा खोलामा तटबन्ध निर्माण गरिने भएको हो। यस सम्बन्धमा पूर्वमुख्यमन्त्री केदार कार्की, महानगरका कार्यवाहक प्रमुख विश्वनाथ भगत, र मन्त्रालयका सचिव प्रदीप वान्तवाको टोलीले डुबान क्षेत्रको निरीक्षण गरेका छन्।
सचिव वान्तवाले कटान भएको क्षेत्रको निरीक्षणपछि करिब १ सय मिटर क्षेत्रमा तारजाली लगाएर तटबन्ध निर्माणको प्रक्रिया अघि बढाइने जानकारी दिएका छन्। उनले लागत इस्टिमेट तयार गरेर तटबन्ध निर्माण गर्ने प्रतिबद्धता जनाएका छन्।
पूर्वमुख्यमन्त्री कार्कीले केसलिया खोलाको बाढीबाट बस्तीलाई सुरक्षित राख्न ‘केसलिया करिडोर’ निर्माणको आवश्यकता औंल्याए। उनले भने, "करिडोर निर्माण गरिए बाढीका कारण हुने डुबानको समस्या दीर्घकालीन रूपमा समाधान गर्न सकिन्छ। यसले न केवल सम्पन्न बस्तीलाई, तर प्रदेश प्रहरी कार्यालय, तालिम केन्द्र, र आसपासका क्षेत्रलाई समेत सुरक्षित राख्नेछ।
स्थानीय बासिन्दाले पनि तटबन्ध र करिडोर निर्माणको पहललाई सकारात्मक रुपमा लिएका छन्, जसले वर्षेनी आउने डुबानबाट मुक्ति दिलाउने विश्वास गरिएको छ।
