विराटनगर, मोरङ – विराटनगर महानगरपालिका–५, सम्झना चोकस्थित एक घरमा बिहीबार बिहान एक भारतीय नागरिक मृत अवस्थामा फेला परेका छन्। भारतको सिलिगुडी निवासी ५० वर्षीय सपन दास, जो गणेश शर्माको घरमा डेरा गरी बस्दै आएका थिए, सुतेकै ठाउँमा मृत अवस्थामा भेटिएका हुन्।
अघिल्लो साँझ खाना खाएर सुतेका दास बिहान ७ बजेसम्म नउठेपछि साथी गणेश राजवंशीले बोलाउने प्रयास गरेका थिए। दासले कुनै प्रतिक्रिया नदिएपछि राजवंशीले प्रहरीलाई खबर गरेका थिए। घटनास्थलमा वडा प्रहरी कार्यालय विराटनगरबाट इन्स्पेक्टर राजेश दत्त नेतृत्वको प्रहरी टोली पुगेको थियो। प्रारम्भिक कानुनी प्रक्रिया पूरा गरी शवलाई पोस्टमार्टमका लागि कोशी अस्पताल पठाइएको छ।
मोरङ प्रहरीले घटनालाई शंकास्पद नरहेको बताएको छ तर मृत्युको वास्तविक कारण भने हालसम्म खुल्न सकेको छैन। यस विषयमा थप अनुसन्धान भइरहेको प्रहरीको भनाइ छ।
