इटहरीः मोरङको कानेपोखरी गाउँपालिका–७ स्थित जङ्गल क्षेत्रमा पैदलयात्रीलाई ठक्कर दिएर फरार भएको सवारी साधनका चालकलाई चार दिनपछि प्रहरीले इटहरीबाट पक्राउ गरेको छ ।
गत आइतबार पूर्व–पश्चिम राजमार्गअन्तर्गत कानेपोखरी–७ मा बा २ झ २२२६ नम्बरको गाडीले ठक्कर दिँदा पथरीशनिश्चरे नगरपालिका–१० निवासी ६० वर्षीय गोविन्द लिम्बू गम्भीर घाइते भएका थिए । उपचारका क्रममा लिम्बूको मृत्यु भएको थियो ।
दुर्घटना भएको क्षेत्र जङ्गल भएकाले सिसी क्यामेरा नहुँदा घटनामा संलग्न सवारी पहिचान गर्न प्रहरीलाई समस्या भएको थियो । घटनास्थलमा गाडीका केही फुटेका पार्टपुर्जा मात्र फेला परेपछि प्रहरीले ती सामग्रीलाई आधार बनाएर अनुसन्धान अघि बढाएको थियो ।
अनुसन्धानको क्रममा दुर्घटनामा संलग्न सवारी सुनसरीको इटहरीस्थित हेभी इक्विपमेन्ट सडक विभागको रहेको पुष्टि भएको प्रहरीले जनाएको छ । प्रहरी टोलीले बुधबार राति करिब १० बजे इटहरीस्थित विभागको कार्यालय परिसरमा लुकाइराखिएको सो गाडी फेला पारेको हो ।
दुर्घटनापछि फरार रहेका चालक सिराहाको सुखीपुर नगरपालिका–८ निवासी ४४ वर्षीय राम उद्गार मण्डललाई पनि प्रहरीले नियन्त्रणमा लिएको छ । चालक मण्डलविरुद्ध सवारी ज्यान मुद्दामा अनुसन्धान तथा कानुनी प्रक्रिया अघि बढाइएको जिल्ला प्रहरी कार्यालय मोरङले जनाएको छ ।
