काठमाडौंः विश्वका ८ हजार मिटरभन्दा अग्ला सबै १४ वटा हिमाल ६ महिना ६ दिनमा चढेर कीर्तिमान बनाएका विश्वप्रसिद्ध नेपाली आरोही निर्मल पुर्जा (निम्स दाइ)को हिमपहिरोमा परी निधन भएको छ ।
पाकिस्तानको ब्रोड पिक हिमाल आरोहणका क्रममा हिमपहिरोमा परी बेपत्ता भएका पुर्जाको मृत्यु भएको पुष्टि भएको हो । बिहीबारदेखि हराइरहेका पुर्जाको निधन भएको उहाँ संस्थापक रहेको संस्था एलिट एक्सपेडले सामाजिक सञ्जालमार्फत् पुष्टि गरेको छ ।
‘हामी गहिरो दुःखका साथ भन्न चाहन्छौं– निर्मल ‘निम्सदाइ’ पुर्जाले ब्रोडपिकमा हिमपहिरोमा परेर ज्यान गुमाउनु भएको छ’, एलिट एक्सपेडले वक्तव्य जारी गरी भनेको छ, ‘अरू आरोहीहरू पनि जीवित नभेटिएको हामीले जानकारी पाएका छौँ ।’
पुर्जा नेतृत्वको १० जनाको आरोही टोली बिहीबार बिहान १० बजे हिमपहिरोमा परेको थियो । सो टोलीमा ६ नेपाली र चार विदेशी आरोही थिए ।
आरोहणका क्रममा करिब ६ हजार ७ सय मिटरको उचाइमा पुगेपछि हिमपहिरो खसेको थियो । त्यसमा परी बेपत्ता भएकाहरुको शुक्रबार अपराह्नसम्म खोजी भएको थियो । शुक्रबारसम्म खोजी गर्दा तीन जनाको शव भेटिएको थियो । शुक्रबार तीनै जनालाई आधार शिविर ल्याएर हेलिकप्टरमार्फत् अस्पताल पुर्याइएको थियो ।
खोजी कार्यमा पाकिस्तानी सेनाको हेलिकप्टर, ड्रोन लगायतका उपकरण परिचालन तथा काराकोरम पर्वत शृंखलामै पर्ने के–२ का आरोहीहरू समेत खटिएका थिए ।
निर्मल पुर्जाकै साथी रहेका प्रतिनिधि सभा सदस्य मिङ्मा डेविड शेर्पा पनि अनुभवी पाइलटसहित शुक्रबार नै ब्रोड पिक क्षेत्रमा पुगेका थिए ।
आज बिहान पुनः खोजी कार्य शुरू गरिएकोमा अपराह्न उनीहरूको मृत्यु भएको पुष्टि भएको हो । आरोहण टोलीमा नेपालका निम्सदाइ सहित पुरबहादुर गुरूङ ‘युक्ता’, किली पेम्बा शेर्पा ‘किलु’, निमा शेर्पा र नवाङ थिन्डु शेर्पा थिए ।
त्यस्तै ओमानका नधिरा अहमद अब्दुल्लाह अल हार्थी, पाकिस्तानका सोहेल साखी, चीनका वाङ जोङ र अमेरिकाकी मालोरी गाइस् थिइन् ।
पुर्जाले उनले ८ हजार मिटरभन्दा अग्ला विश्वका सबै १४ हिमाल ६ महिना ६ दिनमा आरोहण गर्दै नयाँ विश्व कीर्तिमान बनाएका थिए । ब्रोड पिकपछि चोयु हिमाल चढेको खण्डमा पुर्जा ती सबै १४ हिमाल दुईदुई पटक आरोहण गर्ने इतिहासकै पहिलो व्यक्ति बन्ने थिए ।
उनले यो कुरा आरोहणअघि आफ्नो फेसबुकमा पनि लेखेका थिए ।
पुर्जाको निधनमा प्रधानमन्त्री बालेन शाहले दुःख व्यक्त गर्दैै आरोहीहरू साहस र समर्पणका कारण सधैँ अमर हुने बताउनुभएको छ ।
म्याग्दीमा जन्मिएका पुर्जा १८ वर्षको उमेरमा सन् २००३ मा गोर्खा सेनामा भर्ना भएका थिए ।
