इटहरी - पूर्वी झापादेखि पश्चिम नवलपरासीसम्मका थारू समुदायका महिलाहरूले आज जितिया पर्व धूमधामका साथ मनाइरहेका छन्। थारू समुदायसहित तराई क्षेत्रमा बसोबास गर्ने अन्य महिलाहरूले पनि आफ्ना सन्तानको दीर्घायु, कल्याण र समृद्धिको लागि यो पर्वमा व्रत लिएका छन्।
जितिया पर्वमा महिलाहरूले निराहार व्रत बस्दै धर्मकर्म र पूजा-पाठ गर्छन्। यो पर्व विशेष गरी थारू समुदायको प्रमुख धार्मिक र सांस्कृतिक महोत्सव हो, जसमा सन्तानको स्वास्थ्य र सुख-समृद्धिका लागि कामना गरिन्छ।
गाउँदेखि शहरसम्म जितिया पर्वको महत्त्व झल्किने गरी विभिन्न महोत्सवको आयोजना गरिएको छ। काठमाडौं उपत्यकामा थारू महिलाहरूले तीन स्थानमा विशेष कार्यक्रम राखेका छन्। थारू महिला समाजले राष्ट्रिय नाचघर जमलमा, थारू महिला सभाले पर्यटन बोर्ड भृकुटीमण्डपमा, र थारू सांस्कृतिक विकास मञ्चले ललितपुरको कुप्णडोलमा जितिया महोत्सव आयोजना गरेका छन्।
सम्पूर्ण महोत्सवमा थारू परम्परागत नृत्य, भजन, कीर्तन तथा सांस्कृतिक कार्यक्रम प्रस्तुत गरिएको छ। यस अवसरमा थारू समुदायको मौलिक संस्कृति र परम्परालाई सम्मान गर्दै उनीहरूले धार्मिक आस्थालाई अझ सशक्त बनाउँदै आएका छन्।
