विराटनगर - मोरङ प्रहरीले विराटनगरस्थित संगम पार्टी प्यालेसमा जुवा खेलिरहेको अवस्थामा १० जनालाई पक्राउ गरेको छ। जिल्ला प्रहरी कार्यालय मोरङबाट खटिएको प्रहरी टोलीले कात्तिक १६ गते राति १० बजे विराटनगर महानगरपालिका–११ स्थित पार्टी प्यालेसमा छापा मारेर उनीहरूलाई पक्राउ गरेको हो।
प्रहरीको टोलीले छापा मार्दा जुवाडेहरूको साथबाट १० लाख ६ हजार ९९५ रुपैयाँ नगद र ५ बुक तास बरामद गरेको जनाएको छ। पक्राउ पर्नेमा पार्टी प्यालेसका सञ्चालक ५९ वर्षीय पदम श्रेष्ठसहित राजन कडेल (६१ वर्ष), टुनटुन शर्मा (४१ वर्ष), पशुपति भगत (५७ वर्ष), सुरेन्द्र ठाकुर (४७ वर्ष), विरेन्द्र साह (५० वर्ष), ध्रुव सिग्देल (५५ वर्ष), मनिराज प्रसाई (५५ वर्ष), बाबुराम कट्टेल (५० वर्ष), र लिला सहनी (४६ वर्ष) रहेका छन्।
डिएसपी वेद प्रकाश जोशीका अनुसार, गोप्य सूचनाको आधारमा छापा मारिएको थियो। पक्राउ परेका सबै जना विराटनगर महानगरपालिकाका स्थायी बासिन्दा रहेको र उनीहरूलाई हिरासतमा राखी थप अनुसन्धान भइरहेको प्रहरीको भनाइ छ।
अवैध जुवाको कारोबारमा प्रहरीको कठोर कदम
मोरङ प्रहरीले यस घटनालाई गम्भीर रूपमा लिएको र अवैध जुवाको कारोबारमा संलग्न व्यक्तिहरूमाथि कडा कारबाही गर्ने जनाएको छ। प्रहरीले यस किसिमको गतिविधिलाई नियन्त्रण गर्न विशेष अभियान समेत संचालन गरेको छ।
